HEZKUNTZA FORMALETIK HARATAGO
Batxilergoan, ikasleen aurreko 16 urtetako ibilbideari jarraituz, hezkuntza integrala garatzen segitzen dugu. Ikasleari arlo akademikoa eta pertsonala lantzeko aukera eskaintzen zaio, giza eta adimen heldutasuna lortzeko eta bizitza aktiboan arrakastaz zein erantzukizunez jokatzeko.
Ikasleek gero eta autonomia handiago garatzea da Laudio Ikastolaren asmoa. Horretarako ikaslea subjektu aktiboa bihurtzen dugu, ikaslea bera izanik bere ikaskuntzaren protagonista.
PROIEKTU OSAGARRIAK
Irakaskuntza horretan, hezkuntza formala hezkuntza ez formalarekin batuta, proiektu osagarriak eskaintzen dira:
Irteerak, barnetegiak, bidaia kooperatiboak edota topaketak
Batxilergoan hasi aurretik, gurera etortzeko asmoa duten ikasle horiekin topaketa bat egiten da, gure Ikastola eta euren gelakide izango diren horiek ezagutzeko. Behin Ikastola hautatuta, Batxilergoko 1.mailaren hasieran, ikasleen arteko harremanetan sakontzeko barnetegia egiten da.
Ikasturtean zehar ere badira bestelako txango batzuk ere; antzerkia, museoa, orientazioari begirako irteerak, etab.
Batxilergoko 2.mailan “ikaSahara” elkartasun proiektuan parte hartzeko aukera ematen zaie, saharar errefuxiatuen kanpamentuetara bidaia kooperatibo bat burutuz.
Aisialdian aritzeko hezitzaile ikastaroa
Laudio Ikastolak, Ikastolen Elkarteko Aisiola Aisialdi Eskolarekin elkarlanean, aisialdiko hezitzaile izateko ikastaroa eskaintzen du. Ikastolarentzat gakoa da hezitzailerik prestatuenak izatea, gure haur eta nerabeentzat, Ikastolaren baloreekin bat egiten duen aisialdia eskaini ahal izateko. Ikasle horiek Ikastolako Eskolaz Kanpoko Ekintzetan praktikak egin eta lanean aritzeko aukera dute; udalekuak, eski egonaldia, udaberrilekuak, irteerak, ikasturtean zehar eskaintzen diren jarduerak… .
Modu honetan ikastaroko trebakuntza eta ezagutzak praktikan jar ditzakete eta gainera, Ikastolarekin lotura izaten jarraitzeko aukera ere dute.
Hori bakarrik ez, hezkuntza ez formalak, Ikastolak duen irteera profila indartzen laguntzen du; aktiboa, kritikoa, solidarioa, parte hartzailea, autonomoa, eraikitzailea, sortzailea… .
Galde diezaiegun ikasleei!
Aisialdiko hezitzaile ikastaroa bukatuta, Ikastolan lanean ari direnak (ikasle ohiak)
Izadi Respaldiza Basterra (Laudio) eta Iraia Astorkia Goñi (Zeberio), gaur egun Ikastolan dantza modernoa eta patinaje eskolako hezitzaileak zarete. Saharako proiektuan parte hartu zenuten, 2023ko apirilean bertan izan zineten.
Izadi, zer eman zizun ikastaroak?
Monitoretza ikastaroan hainbat gaitasun garatu nituen, hala nola, umeekin eta nerabeekin argi eta zehatz komunikatzen, eta aldi berean, bakoitzaren nahiak eta beharrak entzuten eta ulertzen.
Horretaz aparte, talde bat eramateko behar diren hainbat gaitasun garatu eta eskuratu nituen; taldearen dinamika ulertzea eta horren arabera ekintzak planifikatzea eta talde barruko gatazkak zuzentzea eta konpontzea beste askoren artean.
Ikastaroaren esker eta bertan ikasi nituen gauzei esker, gaur egun eskolaz kanpoko ekintzetan eta aisialdian nire ezagutzak erabil ditzaket egora desberdinak hobeto eramateko.
Iraia, nola izan da Ikastolara hezitzaile gisa itzultzea?
Orokorrean, oso esperientzia polita izan da, umeekin hezitzaile bezala lan egiterakoan momentu desberdinei zelan aurre egin eta ze jarrera mantendu irakatsi dit, momentu hobeago zein txarragoak eduki baititugu. Gainera, ikastolan lan egiteak batxiko oroitzapen asko ekarri dizkit, gogorra izan arren, klasean oso ondo pasatzen nuen eta klasekide zein irakasleekin oso gustura egon nintzen.
Saharako bidaiak ze irakaspen eman zizuen?
Saharako bidaia bizi izan dugun esperientziarik politenetarikoa izan zen, beste kultura, lurralde, pertsona… batzuk ezagutu genituelako, eta Euskal Herriarekin konparatuz uste baino askoz desberdinagoa delako. Izan ere, Saharan bizi diren pertsonen bizi baldintzak nahiko eskasak direla ikusi genuen eta etxeak, eskolak, dendak, etb, izan arren ez daude baldintza egokietan. Hala ere, bertako jendea oso alaia eta pozik bizi zela nabaritu genuen.
Hau ikusita, bidai honek gure egunerokoan ditugun gauzei garrantzi gehiago ematea eta “gauza gutxirekin” pozik mantendu gaitezkeela irakatsi zigun.
Aisialdiko hezitzaile ikastaroa bukatzen ari direnak (batxilergoko 2.mailan)
Markel Garmendia Parra (Laudio) eta Amaiur Pikatza Urresola (Amurrio) ikastaroa bukatzen ari zarete. Abenduan saharar errefuxiatuen kanpamentuetan egon zineten.
Markel, zergatik ari zara ikastaroa egiten?
Txikitatik parte hartu izan dut aisialdiko ekintzatan, bai Ikastolak eskainitakoetan baita Ikastolatik kanpokoetan ere. Hauen oroitzapen onak izan ziren ikastaroa egitera bultzatu nindutenak, gainera Ikastolako ikastaroak balio euskaldun eta hezkidetzaileak izaterakoan aukera ezin hobea iruditu zitzaidan hemen egitea kanpoko beste eskaintza batzuen aurretik.
Amaiur, zer ari zara ikastaroan ikasten?
Ikastaro honetan, haurren hezkuntza-prozesuaren hainbat alderdi aztertu ditugu. Batetik, haurren garapenean hezitzaile batek duen garrantzia eta horren aurrean nola jokatu behar den ikasi dugu. Haurren garapena ulertzea funtsezkoa dela konturatu gara, adinaren arabera dituzten behar fisiko, emozional eta sozialak ezagutzeko.
Hasiera batean, ikastaroa aspergarria izango zela pentsatu nuen, baina gure hezitzaileak modu dinamiko eta dibertigarrian ematen ditu azalpenak jolasen bitartez.
Azkenik, monitoretza ikastaroak hezitzaile euskaldun izateko gaitasunak lantzen ditu. Ikastaroan, euskararen erabilera eta transmisioa funtsezkoak direla ikasi dugu, hizkuntza gure kulturaren eta identitatearen parte izanik.
Saharako bidaitik zer ekarri duzue?
Proiektu hau saharar errefuxiatuen kanpalekuetan, zehazki Aaiun wilayan kokatutako Bucraa herrian gauzatu genuen. Bertan hango familiekin egin genuen egonaldia.
Ikasitakoa eta ikusitakoa ezin dugu hitz soilez adierazi. Kultura, hizkuntza edo ohitura berriak deskubritzeaz baino haratago doa, mundua ikusteko beste modu bat da. Pobrezia eta gosea ez ezik abandonatutako eta ahaztutako herrialde baten borroka ezagutzea, eta horrekin batera errepresioa jasaten duten herriek behar duten laguntzaz kontziente izatea.
Bestalde, bidaiaren prestaketak argi islatzen du Ikastolak betidanik izan dituen balioak, izan ere, bidaia posible egiteko hainbat ekimen egin behar izan ditugu. Ikasleok gure bidaiaren arduradun izanda, besteak beste gure arteko elkarlana, sormena edota parte hartzea garatzea lortu dugu.
Aisialdiko hezitzaile ikastaroa egiten hasi berri direnak (batxilergoko 1.mailan)
Laia Bizkarguenaga Amondo (Orozko) eta Maialen Abezia Martin (Okondo). Ikastaroa egiten hasi berri zarete. 2025ean saharar errefuxiatuen kanpamentuetan proiektu kooperatiboa burutzeko “Road to Bucraa” taldeko kideak zarete.
Zerk bultzatu zaituzte ikastaroa egitera?
Gehien bat haurtzaroan izandako esperientziek bultzatu gaituzte ikastaro honetan parte hartzera, oroitzapen ikaragarriak sortzen dira, eta urteak pasa ahala, nostalgia ere sentitzen dugu.
Laia: Familako eta inguruan ditudan kideek, bizitza osoan udalekuetako monitore izandakoek, gomendatu zidaten hezitzaile izatera, aukera paregabea zela argi utziz.
Maialen: Nik hasieratik argi neukan, esperientzia berriak bizitzeko ideia ona zela, lagunekin ondo pasatzeko baita harreman berriak sortzeko.
Zergatik eman duzue “ikaSahara” proiektuan izena?
“IkaSahara” proiektu aukera paregabea iruditzen zaigu errealitate ezberdin bat ezagutzeko eta elkartasunean oinarritutako esperientzia batean parte hartzeko.
Gure helburua ez da soilik haien egoera gertutik ezagutzea, baizik eta bertako biztanleekin harremanetan jartzea eta ahal dugun neurrian laguntzea. Bidaiaren aurretik, hainbat ekintza eta ekimen antolatu behar izango ditugu finantzaketa lortzeko, eta horrek ere talde-lana, elkarlana eta konpromisoa indartuko ditu gure artean.
Gainera, esperientzia hori gure inguruan partekatzeko aukera izango dugu, beste ikasle batzuei Saharako errealitatea gerturatzeko eta elkartasunaren garrantziaz ohartarazteko. Gure ustez, bidaiak gure bizitzan eragin handia izango du, eta itzultzean, gure ikuspegia eraldatua izango dugu.
