Egungo ikasleek, ikasle ohiek eta lankideek parte hartu zuten atzo egindako agurrean. Prestatutako agurrak ustekabean harrapatu zuen Cesar.
Ikasleek parte hartu zuten ekimenaren antolakuntzan eta dantzak zein musika nagusitu baziren ere, berbaldi hunkigarrietarako tartea ere egon zen.
Cesarrek ekitaldian egondako euskal kulturaren presentzia goraipatu eta etorkizuna diren oraingo belaunaldiak euskara erabiltzera animatu zituen: "Euskara eta Euskal Herria maite baditugu, denok euskaraz hitz eginda gauza handia lortuko genuke, hortaz, erabili euskara!"
Bukatzeko, Izar Mendiguren Cosgaya ikasle ohiak idatzitako bertsoa kantatu zuten.
"BATXILERGOAN TUTORE
GISA LAN BESTE KASKETA
ORAIN TITULU BERRI BAT
DUZU ZESAR: JUBILETA!
HAMARKADAK TA BIHOTZAK
UTZI DITUZU BETETA,
BIBOTEPEAN ADARRA
JOZ, EZ BAKARRIK TRONPETA!
GUREKIN UZTEN DITUZU
HORRENBESTE IKASKETA
ATE BERRIAK IREKIZ
ITXIKO DUZU KRISKETA
MAITE ZAITUGUNEZ GERO
ILARGIRA ETA BUELTA,
ORAIN GOZATU BIZITZAZ
MEREZI DUZU ETA!"
Cesarrek bertsoaren amaiera baliatu zuen bere hitzei hasiera emateko: "orain gozatu bizitzaz dio bertsoak, baina hemen ere asko gozatu dut, talde lanean, ikasleekin lanean... gustoko duzun horretan lanean aritzea gauza ederra da."
Ondo ibili Cesar! Mantala berri horrekin eta saskian dauden produktuekin osatutako menua dastatzeko prest gaituzu!
