2025/26 05 Bekak

Eusko Jaurlaritzako Hezkuntza Sailak 2025/2026 ikasturterako beka deialdia jarri du abian. Eskaerak on-line, internet bidez, bideratzeko aukera eskainiko du urriaren 6ra arte.

2024/25EAN BEKA JASO ZUTENENTZAKO ARGIBIDEAK

2024/25  ikasturtean  beka  jaso  zuten eta  matrikula  kudeatzeko  aplikazioan  jasota  dauden  ikasketak  egiten  ari  diren  ikasleei  Jaurlaritzak beteta  eman(go)  die  eskaera-formularioa.

Formulario  hori  telematikoki eskuratu ahal izango da, helbide elektroniko honetan: www.euskadi.eus/unibertsitateaz-kanpoko-bekak. Halaber, paperean eskuratu ahal izango da Ikastolan.

Formularioan ageri diren datuak zuzenak direla egiaztatu ostean, edota egin beharreko aldaketak egin ondoren, eskaera aurkeztuko da:

a) Telematikoki, aplikazioan eskaera-formularioa elektronikoki sinatuta edota jasotako formularioan ageri den egiaztapen-kodearen bidez.

b) Formularioa paperean sinatuta, eta honako toki hauetakoren batean aurkeztuta:

– Beka-eskaeraren xede diren ikasketak egiteko ikastetxeetan.

– Administrazio Publikoen Administrazio Prozedura Erkidearen urriaren 1eko 39/2015 Legearen 16. artikuluak zehaztutako tokietan, eta Euskal Autonomia Erkidegoko Administrazio Orokorraren eta haren erakunde autonomoen erregistroen sorrera, antolaketa eta funtzionamenduari buruzko apirilaren 29ko 72/2008 Dekretuan adierazitakoetan.

ESKAERA BERRIAK NOLA BIDERATU

Ikastolako idazkaritzan norberak on-line bideratu baina elektronikoki sinatu ez diren eskaerak sinatzeko aukera emango dugu, bai  eta eskaera osoa ere Ikastolatik bideratzeko. Horretarako aurretiko hitzordua eskatu beharko da irailaren 2tik aurrera 94 672 67 37 telefonoan. Harrera ordutegia irailaren 26ra arte 09:00etatik 14:30era izango da eta 29 eta 30ean 09:00etatik 12:00etara eta 15:00etatik 16:30era.

Eskaera guztietan eskaera egiten duen pertsonaren NANaren (aita, ama, tutorea...) eta familia liburuaren kopiak aurkeztu beharko dira. Bestetik, egoeraren arabera, dokumentu osagarriak eskatuko dira: banaketa edo dibortzio kasuetan sententzia, hitzarmen erregulatzailea, pentsioen ziurtagiriak, ikaslearen errolda agiria... ezgaitasunen agiriak, hezkuntza laguntza premia berezietako ziurtagiriak, errenta aitorpena egiten ez dutenen kasuan sarrerak frogatzeko agiria, e.a.

BEKA DEIALDIA

Araudian ageri diren laguntzak eta bete beharreko baldintzak patxadaz irakurtzea gomendatzen dizuegu. Beherago agindua eskuragarri.

LAGUNTZAK ETAPAKA

LAUDIO TXIKI

( I.Kapitulua)

Haur Hezkuntza 1. zikloko ikasleek laguntza mota ezberdina eskura dezakete  matrikulatuta dauden mailaren arabera.

O eta 1 urteko haurrek, 2024an eta 2025ean jaiotakoek, kuotarako laguntza eskura dezakete, hilean gehienez 90 eurokoa.

Ziklo honetarako HH-LH-DBHrako 1. errenta muga egiaztatu behar da kasu guztietan.

HAUR HEZKUNTZAKO 2. ZIKLOA 

( I.Kapitulua)

2 urteko haurrek 200€ko ordainketa bakarra. 1. errenta muga egiaztatu behar da kasu honetan.

3, 4 eta 5 urteko ikasleek, 2023, 2022, 2021 edo 2020an jaiotakoek, 2. errenta muga egiaztatu beharko dute. Ziklo honetan  ikasmaterialerako laguntza, 78€koa da eta  jantokiko laguntza, gehienez 818,80€koa.

LEHEN HEZKUNTZA ETA DBH 

( I.Kapitulua)

LH eta DBH etapatan 4. errenta muga egiaztatu behar da ikasmaterialarako laguntza eskuratzeko, 117€ LHn eta 159€ DBHn eta 2. errenta muga jantokirako,  gehienez 818,80€.

BATXILERGOA 

(II.Kapitulua)

Oinarrizko bekarako (300€) eta Aprobetxamendu akademikoari lotuta osagaiarako (50 eta 125€ artekoa) 4. errenta muga egiaztatu behar da.

Familia-errentari lotutako osagaian, 1.700€, 1. errenta muga egiaztatu behar da.

Bizilekuari lotutako osagaia (2.500€) eta zenbateko osagarrirako (60€) 3. errenta muga egiaztatu behar da.

BERARIAZKO HEZKUNTZA-LAGUNTZA BEHAR DUTEN IKASLEENTZAKO LAGUNTZA ETA SOROSPEN ESPEZIFIKOAK  

(III.Kapitulua)

Hezkuntza laguntza behar duten ikasleentzako laguntza.

Hartzaileak:

-Arreta defizita eta hiperaktibitatearen nahasmendua dutenak.

-Komunikazio eta hizkuntza nahasmendua dutenak.

-Autismoaren espektroko nahasmenduari lotutako premia dutenak.

-Gaitasun intelektual handia dutenak.

Laguntza osagaiak ondorengoak dira:

Irakaskuntza laguntza: 862€

Eskola garraiorako laguntza: 617€

Ikasmaterialerako laguntza: 204€

Pedagogia-berreziketarako laguntza: 913€

Hizkuntza-berreziketarako laguntza: 913€

BALDINTZA EKONOMIKOAK