AGENDA 30
Laudioko ikastetxeak elikagaien xahuketaren aurka lanean
Ikasturte honetan, Laudioko ikastetxeok Eskola Agenda 2030 proiektuan parte hartu dugu, Garapen Jasangarrirako Helburuen (GJH) artean 12. Helburua (Kontsumo eta ekoizpen arduratsua) landuz. Zehazki, arreta berezia jarri da elikagaien xahuketaren arazoan.
Hilabete luzeko lanaren ostean, maiatzaren 29an, gure ikastolako ikasle ordezkaritza batek, herriko beste ikastetxeetako ikasleekin batera, egindako lanaren emaitzak aurkeztu zizkion Laudioko Udalari. Aurkezpenean, ikasleek elikagaien xahuketaren inguruan egindako ikerketen ondorioak, hartutako konpromisoak eta Udalari zuzendutako proposamen zehatzak azaldu zituzten. Udalaren aldetik, alkatea, hainbat zinegotzi eta teknikari izan ziren bertan, ikasleen lana gertutik jarraituz.
Udal ordezkariek, alkatea buru zela, ikasleek aurkeztutako proposamenei eta ekintzei buruzko iritzia plazaratu zuten. Jarraian, galderak egiteko eta iradokizunak trukatzeko txanda iritsi zen. Une hori aukera paregabea izan zen ikasleek eta udal ordezkariek beren ideiak elkarrekin partekatzeko, elikagaien xahuketaren aurkako borrokan bideak eta irtenbideak elkarrekin bilatuz.
