Ikasturte honetan zehar Laudio Ikastolan, Euskal Herriko beste hainbat Ikastolarekin batera, Familiak Eleaniztasunean egitasmoa garatu dugu HIZPRO proiektuaren ekimenez. Dinamikaren helburu nagusia gurasoak hizkuntzaren erabileran euskararen aldeko eragile bilakatzea izan da, hau da, gure ikastolako familiak euskararekiko jarrera pro-aktiboa izateko trebatu eta ahalduntzea.
Paula Kasaresek eta Kike Amonarrizen hitzaldi bana jaso genuen eta horien ostean soziolinguistika eta atxikimenduari buruz landutakoa gure errealitatera ekartzeko bi lur-hartze saio burutu genituen. Izan ere, banatu berri den Ikastolak aldizkariak dinamika azaltzen duen erreportaje interesgarria dakar.
Saio hauetan gure beharretatik abiatuta, ikastolako komunitatean eragiteko hainbat ekintza diseinatu genituen. Gehienak hurrengo ikasturtean gauzatzen hasiko dira, baina lehenengo ekimena orain, udako oporrei begira, jarriko da martxan. Oporretan euskararen presentzia bermatu eta sustatzeko dugun beharra ikusita, euskararen erabileraren konpromiso kontratua prestatu dugu. Komunitate osoari bideratutako kontratua da: guraso, langile eta ikasleentzako.
Beraz, animatu kontratua sinatzera eta uda honetan, edonora zoazela, eraman euskara zurekin!