2023.11.15- Herri Babesarea Foro Ibiltariaren 5. Edizioak atzo geltokia izan zuen Laudion. Horri esker, Ikastolako DBH4ko ikasleek Guatemalako emakume baten ahotik bertako egoerara hurbiltzeko aukera izan zuten.

María Velásquezen historia eta lana ezagutu zuten; Emakumeen Sektoreko Aliantza Politikoko (APSM) bozeramaile eta Abya Yalako Giza Eskubideen defendatzailea da.

Aliantza Politikoko “Emakumeen Sektoreak” beste erakunde eta instituzio batzuekin ekintzak bultzatzen ditu, eta legegintza-proposamenak egiten ditu ere; familia barruko indarkeriaren legea eta feminizidioaren eta beste indarkeria mota batzuen aurkako legeak, besteak beste.

Horrez gain, kolektiboak emakumeen autonomia eta boterea areagotuko duten prozesuak ezartzeko lan egiten du, garapen-kontseiluak izeneko sisteman parte har dezaten. Organo horrek nazio-, udal- eta komunitate-mailan erabaki garrantzitsuak hartzeko balio du.

Era berean, Emakumeen Sektoreak emakumeen eskubideak hobetzeko ekintzak jarri ditu abian, eta hiru ardatzetan oinarritzen dira nagusiki: sendotze politikoan, garapen ekonomikoa emakumeentzat, eta emakumeen aurkako indarkeria desagerraraztea.

Proiektu horren bidez, Guatemalako tokiko erakundeek prestakuntza politikoko eta ekonomia feministako eskolak bultzatzen dituzte, eta, horrela, berezko metodologiak eraikitzen dituzte herri-hezkuntzaren, espiritualtasunaren eta feminismoaren artean.

Beste errealitate batzuetara eta feminismora hurbiltzeko aukera paregabea izan zen, gainera orain, azaroaren 25aren testuinguruan, emakumeen egoerez, aldarrikapenez hausnartzeko tartea ere izan zuten.